Зимската служба на Општина Битола е активирана од рано утрово по врнежите од снег кои започнаа во текот на ноќта. Механизацијата на ЈП „Нискоградба“ е на терен и врши расчистување и посипување на улиците низ градот, со цел овозможување безбедно и непречено движење на сообраќајот и пешаците.
На терен утрово беше и градоначалникот на Општина Битола, Тони Коњановски, заедно со директорите на јавните претпријатија „Нискоградба“ и „Комуналец“, кои извршија увид во активностите на зимската служба и тековните интервенции.
Како што информира директорот на ЈП „Нискоградба“, Зоран Талевски, камионите-посипувачи на терен излегле во 3:30 часот. До 7:00 часот утрово, за одржување на коловозите употребени се 12 тони сол и 8 метри кубни ризла.
Чистењето се одвива согласно утврдениот приоритет, при што виталните сообраќајници и пристапите до јавните институции се веќе оспособени за нормално функционирање. Во текот на денот екипите ќе продолжат со расчистување на улиците од втор и трет приоритет, како и на патиштата кои водат до населените места.
Надлежните апелираат до граѓаните да не фрлаат снег на коловозите, со цел да не се отежнува работата на механизацијата и да се зголеми безбедноста во сообраќајот.
Воедно, деновиве беше промовирана и апликацијата „Битола – Зимска служба“, преку која граѓаните во реално време можат да ја следат работата на зимската служба, односно да добијат информации за тоа која машина интервенира, на која улица, пат или населено место.
Фото: Општина Битола
