Со јасна порака до граѓаните и со чувство на одговорност стекнато низ години посветена работа, Либерално-демократската партија (ЛДП) Битола ги најави своите кандидати за претстојните локални избори.
„Излегуваме пред битолчани со чист образ, со крената глава и со целосна посветеност. Не ветуваме невозможни нешта, туку бараме доверба за да продолжиме да работиме домаќински – како што тоа отсекогаш сме го правеле“, порачуваат од Општинската организација на ЛДП Битола.
Од партијата потсетуваат дека нивните кадри, таму каде што имале можност да делуваат, било во јавните претпријатија, градинките, училиштата или Советот на Општината, оставиле зад себе препознатливи резултати.
„Нашите луѓе работеа со срце и душа за Битола. Без ароганција, без галама, со дело,“ велат од ЛДП – Битола.
Особено гордост предизвикува вложувањето во спортот. Ракометниот, кошаркарскиот и фудбалскиот клуб, кои во минатото се соочуваа со сериозни предизвици, повторно добија сјај благодарение на визијата и поддршката што ја добија во периодот кога ЛДП беше активно вклучена во нивната трансформација.
„Не ја бараме довербата за да плукаме по другите. Не бегаме од одговорност. Не менуваме страни од ден на ден. Ја бараме довербата за да работиме – искрено, чесно и во интерес на граѓаните“, децидни се од ЛДП Битола.
На врвот на листата за Советот се најдоа: Димитар Кузмановски – претседател на Општинската организација и д-р Ана Талевска Јолевска – специјализант по интерна медицина
Со оваа поставеност, ЛДП влегува во изборната трка со јасна намера да биде коректив, двигател и партнер на граѓаните, со програма базирана на реализирани проекти, а не празни ветувања.
