Градските власти во Атина најавуваат серија мерки за ограничување на неконтролираниот раст на туризмот, откако бројот на посетители достигна ниво кое сериозно го оптоварува секојдневниот живот во централните делови на градот.
Градоначалникот Харис Дукас предупредува дека историските квартови, особено околу Акропол и населбата Плака, веќе се соочуваат со преголема концентрација на туристи. Според него, ваквиот тренд доведува до раст на цените на становите, иселување на локалното население и преоптоварување на инфраструктурата.
Како дел од новата стратегија, се разгледува воведување забрана за нови туристички објекти во најпосетените зони, како и привремено стопирање на дозволите за изградба на хотели во центарот. Инвеститорите ќе бидат насочувани кон помалку развиени делови од градот со цел подобра рамнотежа.
Паралелно, градот работи на подобрување на основната инфраструктура – од водоснабдување и енергетски системи до дигитални мрежи – за да одговори на притисокот од милионите туристи што ја посетуваат грчката престолнина секоја година.
Поддршка за ваквите мерки доаѓа и од дел од туристичкиот сектор, кој посочува дека слични ограничувања веќе се применуваат во градови како Барселона, со цел да се зачува квалитетот на живот и одржливиот развој.
Од локалната власт нагласуваат дека приоритет ќе биде обезбедување достапно домување и повеќе јавни простори за жителите, со јасна порака дека развојот на туризмот мора да биде во рамнотежа со интересите на граѓаните пренесува бизнис вести.
