ЈКП „Водовод“ – Битола ќе добие техничка и финансиска поддршка за подобрување на работните перформанси и зголемување на енергетската ефикасност, во рамки на проектот „Отпорни и ефикасни комунални претпријатија во Северна Македонија“.
Договорите за спроведување на овој значаен проект беа потпишани денес во Министерството за животна средина и просторно планирање. Проектот се реализира во партнерство помеѓу Владата на Република Северна Македонија и Владата на Швајцарската Конфедерација, преку Државниот секретаријат за економски прашања (SECO).
Од страна на општина Битола, договорот го потпишаа градоначалникот Тони Коњановски и директорот на ЈКП „Водовод“, Андреј Гинов.
Проектот има за цел да ја зајакне отпорноста на комуналните претпријатија во справувањето со климатските промени, енергетските предизвици и демографските трендови. Преку унапредување на оперативните и финансиските капацитети, како и со користење на обновливи извори на енергија, ќе се овозможи подобрување на услугите кон граѓаните и поефикасно управување со ресурсите.
Поддршката опфаќа модернизација на инфраструктурата, како и унапредување на институционалната и регулаторна рамка, што е од суштинско значење за долгорочна одржливост. Битола е една од седумте општини избрани да ги искористат придобивките од овој проект.
