По реакциите на јавноста за дивеење и оштетување на новите спортски терени во основното училиште „Елпида Карамади“, Општина Битола најавува поставување камери покрај чуварската служба.
Во нецели десет дена од отворањето на комплексот на нови спортски терени во „Елпида Караманди“ во кои се вложени 22 милиони денари, вработени во училиштето констатирале дека не само што се кршат реквизитите се валка и уништува на игралиштата, спортска и урбана опрема, туку дека е направена штета и на поставеното сандаче за струја, кое содржи модул преку кој се вклучуваат и исклучуваат рефлекторите, што може да биде опасно по живот.
Битолчани на социјалните мрежи бараат видео надзор за да се сочува направеното, оти во изминатиот период се сведоци на многу случаи кога вандали уништуваат општински имот, спортски игралишта, бисти и споменици, клупи и канделабри во Градскиот парк и на други локации низ градот.
Општината најавува дека ја почна постапката за набавка на видео надзор и во иднина секое дивеење на новите спортски терен ќе се снима, а снимките ќе се користат за евентуално сторено кривично или прекршочно дело, нарушување на јавен ред и мир, или кршење на друга спортска или урбана опрема.
Новите спортски терени во Битола беа пуштени во употреба пред празникот Илинден.
Извор: Независен
