По повод премиерата на претставата „Рибарски караници“ во режија на Јован Ристовски, која ќе биде изведена крај Ротинското Езеро, Битолскиот театар, со поддршка од Општина Битола, започна со реконструкција на патот што води до езерото – туристичка атракција на која за првпат ќе се одигра театарска претстава.
Овој настан претставува уште еден доказ дека театарот навистина го менува светот.
„Театарот не е професија, театарот е начин на живот. Голема благодарност до сите кои деноноќно работат на логистиката за на 25 јули да се случи спектакл, благодарност до Општина Битола за довербата и безрезервната поддршка, како и до сите јавни претпријатија и приватни компании кои секојдневно помагаат во реализацијата на овој проект. Да живее театарот“, изјави директорот Васко Мавровски.
Во комедијата по текст на Карло Голдони играат: Никола Стефанов, Јулијана Мирчевска, Никола Пројчевски, Соња Ошавкова, Петар Горко, Марија Цветановска, Леонида Гулевска, Валентин Дамчевски, Елена Мошевска, Живко Борисовски, Петар Спировски, Александар Димитровски, Илина Чоревска, Катерина Аневска-Дранговска и Марија Стефановска.
Фото: Народен театар – Битола
