Браќата Методија и Михајло Илиевски од Битола повторно добија доверба од Европската ракометна федерација (ЕХФ). Тие се делегирани како судии на решавачкиот реванш натпревар од третото квалификациско коло за пласман во групната фаза на Лигата на Европа.
Нашиот успешен ракометен судиски двоец ќе ја дели правдата на дуелот меѓу српскиот шампион Црвена Звезда и унгарскиот тим Естергом, натпревар што ќе одлучи кој ќе продолжи во елитното европско друштво.
Средбата е закажана за 15 ноември (петок) со почеток во 18:00 часот, во Спортскиот центар „Вождовац“ во Белград, а делегат на натпреварот ќе биде Романецот Кожокару.
Со овој натпревар, браќата Илиевски од Битола ја продолжуваат успешната сезона на европската сцена, каде редовно се ангажирани на натпревари под капата на ЕХФ.
