Бијонсе доживеа застрашувачка техничка непријатност за време на нејзиниот прв од двата концерти од турнејата „Каубојката Картер“, во Хјустон, Тексас, САД. Но, се справи со незгодата „како професионалка“, објави „Пипл“ (People).
Во сабота, ар-ен-би пејачката ја изведуваше својата песна „16 Carriages“ во автомобил што висеше над публиката на стадионот во Хјустон, но големиот реквизит почна да се навалува во воздухот… Застрашувачкиот миг е споделуван и како видеоснимки на „Тикток“, „Фејсбук“ итн., каде што се гледа како Бијонсе седи на врвот на црвениот, врзана со сигурносен појас и се држи за еден од каблите прикачени на автомобилот што се навалува.
– Стој, стој, стој, стој, стој!, вели пејачката потоа во микрофонот, додека музиката се исклучува.
Бијонсе останува да во воздухот, повторно погледнува надолу кон земјата, па нагоре, пред да се насмевне кон публиката. По неколку секунди, додека сè уште виси во воздух, пејачката се обидува да ги смири своите обожаватели.
– Ви благодарам на сите за вашето трпение, вели таа.
Бијонсе потоа e безбедно спуштена на стадионот, заедно со возилото. За крај, таа ѝ се насмевнува на публиката, додека светлата се исклучуваат.
На друго видео на мрежата „Икс“, Бијонсе им вели на луѓето: – Ако некогаш паднам, знам дека сите ќе ме фатите!, што предизвикува општо воодушевување во тој миг.
Точката со автомобил во воздухот таа ја изведе и во Лондон, Велика Британија.
Фото: Фејсбук-објава, фотоисечок
