Концерт на оперски арии, дуети и соло песни, во изведба на тенорот Илија Белистојаноски, сопранот Ана Митоска и пијанистот и професор Дарко Мариновски, ќе се одржи вечерва (28 јули) од 20 часот, во ЦК „Марко Цепенков“ во Прилеп.
Концертот, поддржан од Министерството за култура, е богат музички мозаик од композиции, внимателно избрани бисери на музичката литература, напишани од великаните: Антонио Калдара, Џакомо Доницети, Волфганг Амадеус Моцарт, Георг Фридрих Хендел, Пиетро Маскањи, Џакомо Пучини, Џузепе Верди, Жил Масне, Марин Ламберт и Винченцо Белини.
„Секој од овие врвни музички мајстори ни оставил свое наследство во светот на операта и класичната музика, а изведувачите низ нивните интерпретации ќе ја донесат магијата на овие вистински музички чуда низ светот на емоциите, страста и чистината на вокалната изведба, додека Дарко Мариновски на пијаното ќе ги оплемени овие дела со своето мајсторство“, велат од Центарот.
