Болничарката заразена со конго кримска хеморагична треска од денеска е на рибавирин. 48 годишната пациентка веќе ја прими првата доза од антивирусниот лек кој Инфективна го набави за тешка форма на болеста. По 6 дена од појавата на симптомите и промена на здравствената состојба, конзилиумот на клиниката одлучил да биде ставена на новата терапија.
– Таа е во стабилна состојба, но согласнo текот на болеста веќе е влезена во оној стадиум на хеморагија кога може да дојде до крварење. Имала мало крварење и почнавме. Рибавиринот е лек кој дејствува на ширење на вирусот, намалувањe на неговата моќ, но таа добива и друга терапија, вели д-р Милена Стевановиќ директор на Клиника за инфективни болести.
Антивирусниот лек кој болничарката ќе го добива уште 4 дена може да има и несакани ефекти и затоа во конзилиумот лекари има и трансфузиолог и хематолог. Од Инфективна се категорични дека младата жена од Штипско која почина од конго кримска хеморагична треска по убод од крлеж, не можела да биде спасена и да имало рибавирин бидејќи дијагнозата и смртта кај неа настапиле за неколку часа а болеста имала брза прогресија. Оваа терапија според инфектолозите никој не ја набавува за резерва и ја немале и земји каде има повеќе случаи на заразени.
– Ја нема ни Косово, Албанија, Бугарија…земји каде има повеќе случаи. Никој не чува резерви. Засега нема пишан документ во светската лутература колкав е бенефитот, колкав е процентот на преживување по примање на овој лек, вели Стеваковиќ.
Болничарката од Инфективна се заразила за време на ноќно дежурство од жената од штипоско која почина од конго кримска хеморагична треска. И за двата случаи на заразени Државниот санитарен и здравствен инспекторат стави 39 лица под здравствен надзор – што подразбира нивна 14 дневна постојана комуникација со епидемиолог.
Оваа болест е смртоносна кај повеќе од 40 проценти од случаите и ја преенсува заразен крлеж. Избегнување на шумски предели и соодветна облека се препораките за заштита од убодите на овие инсекти.
