Бојан Бојкоски е новиот претседател на Советот на Општина Битола. На денешната седница, тој официјално ја презеде функцијата, истакнувајќи дека ја прифаќа со голема чест, одговорност и посветеност кон граѓаните.
Во своето обраќање, Бојкоски им се заблагодари на советниците и на битолчани за довербата, нагласувајќи дека овој мандат ќе биде насочен кон реализација на што повеќе развојни проекти. Тој потенцираше дека поддршката од Владата е клучен двигател за напредокот на општината, обезбедувајќи финансиски средства и институционална помош за инфраструктура, образование, спорт и јавни услуги.
„Граѓаните не чекаат ветувања, тие очекуваат резултати“, порача Бојкоски, истакнувајќи дека реализацијата на проектите мора да биде побрза и поквалитетна. До градежните компании упати јасен апел да ги почитуваат роковите и стандардите, најавувајќи санкции за доцнење и неквалитетна изведба.
Новиот претседател посочи дека Советот мора да стане место на конструктивна дебата, а не на лични навреди и политички пресметки. Тој најави дека нема да толерира недолично однесување и додаде дека очекува одлуките да се носат со консензус и во интерес на граѓаните.
Бојкоски најави и унапредување на Деловникот за работа, модернизација и дигитализација на Советот, со цел поголема ефикасност, транспарентност и достапност за јавноста.
„Битола заслужува совет што гради, а не совет што кочи и разединува. Само обединети можеме да создадеме подобра Битола“, порача тој.
Со новата поставеност и најавените реформи, Советот на Општина Битола влегува во мандат исполнет со очекувања за реални промени и видлив развој.
Фото: Бојан Бојкоски Фејсбук профил
