Британската актерка Кира Најтли ја објави својата прва книга за деца насловена „Сè уште те сакам исто“. Сликовницата е инспирирана од нејзиното искуство со мајчинството.
Приказната е раскажана од детска перспектива и се занимава со големите семејни промени, несигурностите и стравовите што се јавуваат откако во семејството ќе пристигне братче или сестриче.
„Главната хероина тргнува на патување низ волшебни шуми и таинствени мориња. На тоа патување ги следи трагите од пораките на својата мајка и се обидува да го пронајде патот до дома“, стои во синопсисот.
Според Најтли, сликовницата им нуди утеха на децата и ги потсетува дека родителската љубов не се намалува ниту исчезнува. Таа е наменета за заедничко читање со родителите, и разговор за љубовта, промените и чувствата за кои понекогаш е тешко да се зборува.
„Сè уште те сакам исто“, има 80 страници. Наменета е за најмладите читатели и нивните семејства.
Извор: МИА / Фото: Википедија
