Британската министерка за надворешни работи, Ивет Купер, денеска ќе порача дека пловидбата низ Ормутскиот Теснец, клучен за глобалното снабдување со енергија, мора да остане бесплатна. Со ова, Лондон се спротивставува на намерата на Иран да воведе патарини за премин низ овој витален воден пат, кој транспортира приближно една петтина од светската нафта и гас, пишува Reuters.
Иран претходно соопшти дека сака да воведе такси за премин на бродови низ Ормутскиот Теснец, кој имаше статус на меѓународен воден пат пред американско-израелската војна со Иран.
„Фундаменталните слободи на море не можат еднострано да се укинат или продадат на индивидуални понудувачи. Слично на тоа, нема место за наплатни рампи на меѓународен воден пат. Слободата на пловидбата значи дека пловидбата мора да биде слободна“, се вели во извадоци од говорот што Купер ќе го одржи во Лондон.
Купер, исто така, ќе ги повтори повиците од светските лидери Либан да се придружи на двонеделното примирје договорено во вторник од Иран и САД.
Во меѓувреме, во среда, Израел ги започна своите најголеми напади досега врз Либан, насочени кон позициите на милицијата Хезболах, поддржана од Иран пренесува кајгана.
