Екипите на Башкими и Вардар ги поделија бодовите во меч исполнет со многу пресврти и дури шест погодоци. Домаќините влегоа подобро во натпреварот и уште на самиот почеток создадоа сериозен притисок. Луис Рибеиро во два наврати опасно се закани кон голот на Вардар, но голманот Талески беше на висина на задачата и не дозволи изненадување. Сепак, во третиот обид Башкими дојде до посакуваното водство — по одлично изведениот корнер, Фати Исмаили највисоко скокна и со прецизен удар со глава затресе за 1-0. Набрзо потоа, Маимона имаше извонредна можност за втор гол, но Талески повторно со сигурна интервенција ги спаси гостите.
На спротивната страна, Вардар се обиде да возврати кога Омерагиќ убаво ја смири топката и го проигра Спахиу, чиј удар замина над пречката. Казната стигна во 32-рата минута. По брзиот противнапад, Рашид вешто го заобиколи излезениот Талески и низ нозете на Најдовски ја испрати топката во мрежата за убедливи 2-0. Гостите сепак успеаја брзо да се вратат во игра пред паузата: во 38-мата минута Јанкулов проби и центрираше, а одбиената топка од домашната одбрана стигна до Бабунски, кој ладнокрвно погоди во незаштитениот агол за 2-1.
Второто полувреме започна со силен притисок на Вардар, а Бабунски прв ја отвори серијата закани со силен шут од далечина. Башкими можеше да ја врати двојната предност во 66-тата минута, но ударот на Ристовски беше запрен од расположениот Талески. Тоа беше најава за голем пресврт и за само две минути Вардар го шокираше домаќинот. Закариќ стана херој на црвено-црните со два брзи погодоци во 70-тата и 72-рата минута (2-3).
Вистинска драма следуваше во завршницата. Во 77-мата минута Спахиу не успеа да ја искористи колосалната шанса кога излезе сам пред домашниот голман.
Во 86-тата минута, неуморниот Рашид одлично проби по десната крилна позиција и асистираше во шеснаесетникот, каде Саити беше во вистинско време на вистинското место и погоди за конечни 3-3. До крајот на средбата немаше нови промени во резултатот, па двата тима мораа да се задоволат со по еден бод.
