Македонскиот првак Вардар успешно ја стартуваше одбраната на титулата, откако на Националната арена „Тодор Проески“,вчера ја совлада Брегалница со 2-0.
Димитар Данев во 27.минута и Горан Закариќ во 81.минута беа стрелци на головите за вардарци, кои апсолутно ги заслужија трите бода со прикажаното на теренот.
Струга Трим Лум полесно од очекуваното ја совлада Шкендија Арачиново .
Првата шанса на натпреварот во Струга ѝ припадна на Шкендија Арачиново, но обидот на Аритон Мемеди заврши над голот на домашните. Само осум минути подоцна, Мемеди излезе очи в очи со голманот Стојчевски, но вториот излезе како победник од овој дуел.
И третата последователна можност беше за гостите: Мемеди асистираше во шеснаесетникот за Ливарека, кој силно упати удар, но реакцијата на домашниот чувар на мрежата повторно беше одлична. На спротивната страна се закани Арбин Воша, но голманот Столевски беше сигурен.
Во 22-та минута, Диако силно биеше од околу 18 метри, но топката замина покрај стативата од голот на Шкендија Арачиново — најава за промена на резултатот.
По нафрлувањето во шеснаесетникот од Папе Фал, напаѓачот Марјан Радески рутински погоди од непосредна близина. Домаќините имаа можност да ја зголемат предноста кога Агамах се најде очи в очи со гостинскиот голман, но тој не дозволи втор гол.
Сепак, во последната минута од првото полувреме, Агамах излезе победник во дуелот со голманот Столевски и го постигна својот прв личен гол, а втор за Струга Трим Лум на овој натпревар.
Во второто полувреме први се заканија гостите: Рушити асистираше во шеснаесетникот за Марко Симоновски, кој силно биеше, но голманот Андреј Јовчевски беше на висина на задачата.
Веќе во следната акција, во 51-та минута, Струга Трим Лум се избори за пенал. Рочи асистираше во шеснаесетникот, а Аризанкоски го фаулираше напаѓачот Агамах, па судијата покажа на белата точка. Буњамин Шабани беше прецизен и го постигна третиот гол за домашните — идеален начин да го круниса својот 200-ти јубилеен настап во дресот на Струга Трим Лум.
Mалку подоцна, Агамах имаше уште една шанса за четврти гол, но гостинскиот голман повторно одлично реагираше. Во 65-та минута, Марјан Радески биеше со глава, но топката заврши во стативата.
Во 73-та минута, Дашмир Елези обиде удар од 20 метри, но Јовчевски го одбрани овој обид и не дозволи Шкендија Арачиново да го постигне својот прв гол во домашната елита. Неколку минути подоцна, Амир Нухија во дресот на Струга упати силен удар од 18 метри, но топката заврши надвор од рамките на голот.
