Претпладнево во битолското село Маловишта, единствено населено место кое се наоѓа во Националниот парк Пелистер, ќе се одржи Василичарски карневал.
Низ улиците на планинското село Маловиште ќе продефилираат учесници со маски, потсетувајќи на дамнешната традиција која се одржувала токму на Василица, соопштија од организацискиот одбор.
Василичарскиот карневал е можност да се потсети и на туристичкиот потенцијал на потпелистерското село Маловишта, место со убави куќи градени од камен до кои се доаѓа по камени улици, а преку водените брзаци се поминува по камени мостови изградени од познатите мајстори во тој крај.
Во селото Маловишта се наоѓа црквата „Св. Петка“ со сочуван иконостас, вистинска реткост на ова поднебје, сличен на иконостасот во Бигорски манастир, а во ова битолско село во 1892 година го изработил мајсторот Димитриј. Во црквата има и галерија од икони.
