Заборавете на класичните бои за велигденски јајца – оваа година, трендот што се шири на социјалните мрежи нуди поинаков, природен и визуелно впечатлив пристап. Станува збор за боење јајца со црвено вино, техника која е истовремено едноставна и ефектна.
Јајцата се подготвуваат во вино, а потоа се оставаат да стојат подолго време за да ја впијат бојата и да добијат специфична текстура. Резултатот се длабоки нијанси што варираат од бордо до виолетова, а со додавање шеќер се создава и суптилен сјаен ефект. Најголемата предност е што не се користи ниту една капка вештачка боја.
Како да ги обоите велигденските јајца со црвено вино? За оваа техника ви се потребни неколку основни состојки: јајца, околу еден литар црвено вино (по можност потемно), една лажица оцет и сад за варење.
Подготовка
Сварете ги јајцата да бидат тврдо варени.
Во сад загрејте го виното и додајте една лажица оцет. Не треба да зоврие, доволно е да биде топло. Внимателно ставете ги јајцата во виното и оставете ги да стојат. За посветла нијанса доволни се околу 30 минути, а за поинтензивна боја – неколку часа или преку ноќ. Доколку сакате сјаен, „кристален“ ефект, во виното може да додадете малку шеќер.
Откако ќе ги извадите, нежно исушете ги со хартиена салфета, без триење. По желба, може да ги премачкате со малку маслиново масло за дополнителен сјај. За дополнителна естетика, пред варењето може да ги завиткате јајцата во газа заедно со ливчиња магдонос, кромид или цветови, со што ќе добиете природни шари налик на графика. Оваа техника може да се комбинира и со други природни бои, како лушпи од кромид, куркума или цвекло, со што ќе создадете богата палета инспирирана од природата.
Слободен печат
