Осум лица завршија во Клиничката болница во Битола по тешка сообраќајна несреќа што утрово се случи на магистралниот пат А3 Битола – Прилеп. Во верижниот судир кај мостот на реката Шемница учествувале четири патнички возила. Поради силината на ударот и увидот што го вршат полицијата и јавен обвинител, сообраќајот на оваа клучна делница беше во целосен прекин од 9:00 часот.
Од Клиничката болница во Битола потврдија дека кај нив се хоспитализирани сите осум лица од несреќата. Поради сериозноста на повредите, еден пациент веднаш бил внесен во операциона сала. Останатата група повредени е распоредена на болничките одделенија, шестмина се задржани на хирургија, а двајца се лекуваат на ортопедија. Според болнички извори, со исклучок на оперираниот пациент, останатите се во стабилна општа состојба, но остануваат под постојан лекарски надзор.
Веднаш по дојавата за верижниот судир, на терен излегоа екипи на СВР Битола, Итната медицинска помош и Противпожарната единица. Од ТППЕ Битола информираа дека нивните екипи превентивно интервенирале за обезбедување на локацијата. И покрај големата материјална штета и силината на судирот помеѓу четирите автомобили, не изби пожар во ниту едно од возилата.
Полициски екипи на СВР Битола и надлежен јавен обвинител вршат детален увид на местото на настанот. Официјалните причини кои довеле до сообраќајната несреќа ќе се знаат по завршување на увидот и анализата на сите траги од теренот.
