Вечерва погледите на љубителите на домашната рок-сцена ќе бидат насочени кон Битола, каде во рамките на јубилејното 25. издание на фестивалот „Битола Отворен Град“, на Широк Сокак ќе настапат легендарните Суперхикс, одбележувајќи го својот 300-ти концерт во Македонија.
Од бендот деновиве ја споделија радосната вест со своите фанови:
„Дали сте знаеле дека овој битолски концерт е јубилеен концерт број 300 на Суперхикс во Македонија! Славиме јубилеј заедно со вас Битолчани! Причина повеќе да биде уште полудо и незаборавно!“
Податокот за значајниот јубилеј го потврди и познатиот музички хроничар Тошо Филиповски, кој со години ја документира историјата на македонската рок-сцена.
Во текот на трите децении на сцената, бендот реализираше стотици настапи, создаде бројни хитови и се етаблираше како еден од најомилените концертни состави во Македонија. Од средината на деведесеттите до денес, Суперхикс остануваат препознатливи по својата неисцрпна сценска енергија и препознатливиот спој на ска, панк, рок и реге звуци.
Настапот на Суперхикс е централниот музички настан на годинашното јубилејно 25. издание на фестивалот „Битола Отворен Град“, кој од 24 до 27 јуни повторно ги претвора битолските улици, плоштади и алтернативни простори во сцени за музика, уметност и културни содржини. Фестивалот, кој годинава одбележува четврт век постоење, важи за една од најзначајните урбани културни манифестации во Македонија и низ годините прерасна во еден од препознатливите културни симболи на Битола.
Покрај Суперхикс, вечерва пред битолската публика ќе настапат и битолскиот бенд Eruption, како и српскиот состав Osmi Dan, познат по своите интерпретации на песни од Linkin Park, Metallica, Prodigy, U2, Ramones и други светски рок великани.
Организаторите најавуваат вечер исполнета со силна музичка енергија и атмосфера достојна за двојниот јубилеј – 25 години „Битола Отворен Град“ и 300 концерти на Суперхикс во Македонија.
За љубителите на домашната рок-сцена, ова ќе биде ретка можност да бидат дел од уште едно значајно поглавје во историјата на Суперхикс – бенд кој и по три децении успешно ја одржува својата врска со публиката и продолжува да ја претвора секоја сцена во голема музичка прослава.
