„Велат времето, времето лечи се, но што ми вреди вечноста без тебе“, текстот е од рефренот на последната песна што ја отпеа Тоше Проески. Македонскиот славеј умре пред речиси 17 години, а песната дури сега ја виде светлината на денот со помош на вештачката интелигенција.
Користејќи ги алатките на вештачката интелигенција, познатиот македонски радио водител, диџеј и продуцент Кирил Зарлинов, попознат како диџеј Ерик Фокс, решил да го заврши и монтира студиското демо кое, како што наведува, му го „доверил“ неговиот пријател Тоше и – конечно го објави.
Првата демо снимка е направена во септември 2004 година во домашното студио на Кирил. Кирил реши по повод неговиот роденден на сите фанови на Проески да им ја подари песната „Велат времето лечи се“, за никогаш да не бидат заборавени неговиот имиџ и дело.
„Голема благодарност до целиот тим кој несебично помогна во реализацијата на песната: Давор Јордановски, Дарко Тасев, Иле Спасев, Јован Јованов и Александар Тасиќ од Лесковац.Посебна благодарност до Александар Трајановски кој ја донесе песната во Македонија и му ја понуди на Тоше“, изјави Кирил.
За видеото се погрижи екипата на Студио 35 од општина Кавадарци, светски позната по изработката на видеа за најголемите светски ѕвезди како Аријана Гранде, Дејвид Гета, Ед Ширан и многу други. Зарлинов посебно се заблагодари на семејството на Тоша Проески за поддршката во овој проект.
