Управата за јавни приходи (УЈП) ја објави листата на фирми должници за долгови доспеани до 30 септември 2023 година и неплатени заклучно со 31 декември 2023 година. Според таа листа, вкупно 1.857 фирми и 3.716 граѓани се со ненамирени даночни обврски од 10.108.704.233 денари или 164,3 милиони евра.
Споредено со претходниот извештај, бројот на фирми должници, меѓу кои и јавни претпријатија овој пат е поголем за 25, односно 74 граѓани повеќе должат кон УЈП. Следствено на тоа, има пораст на обврските за 1.054.342.622 денари или 17,1 милион евра.
Од УЈП информираат дека нето-долгот за даноци и придонеси изнесува 9.925.148.873 денари што е 161,3 милиони евра. Тоа е за 1.078.256.547 денари, односно за 17,5 милиони евра повеќе од износост наведен на претходната листа. Долгот за царински давачки е 183.555.360 денари, односно безмалку три милиони евра и е намален за 23.913.925 денари (388,7 илјади евра).
Инаку, листата на должници УЈП ја објавува за долгови по основ на ДДВ, данок на добивка, персонален данок на доход, придонеси од задолжително социјално осигурување, акцизи и царини, за кои вкупниот износ на долгот е повисок од 120.000 денари за физичките лица и самостојни вршители на дејност; и повисок од 300.000 денари за правните лица.
