Чоколадните колачи им се омилени на многумина. Особено кога се комбинирани со овошје.
Овојпат избравме едноставен рецепт за чоколадни брауни колачиња со малини.
Потребни состојки:
- 100g путер
- 150g темно чоколадо искршено на коцки
- 3 јајца
- 100g шеќер
- 65g брашно
- 3 лажици какао
- ½ лажичка прашок за печиво
- Прстофат сол
- 120g малини (свежи или смрзнати)
Начин на подготовка:
- Загрејте ја рерната на 180 степени Целзиусови. На дното на тава со димензии 20х20cm ставете хартија за печење, а ѕидовите премачкајте ги со путер и брашно за да не се залепи колачот.
- Путерот стопете го на среден оган и пред да почне да врие, додајте го чоколадото што сте го искршиле на коцки.
- Мешајте без престан додека да се стопи чоколадото и да добиете мазна смеса, па тргнете го садот на страна за смесата да почне да се лади.
- Во посебен сад ставете ги јајцата и шеќерот и матете околу 1 минута.
- Во изматените јајца додадете ја чоколадната смеса која треба да биде млака – ни многу топла ни целосно изладена.
- Додајте ги сувите состојки – брашното, какаото, прашокот за печиво и малку сол.
- Смесата спојте ја мешајќи со лажица, а не со миксер. Кога ќе добиете мазна смеса, додадете ги скоро сите малини.
- Откако ќе ја ставите смесата во тавата за печење, одозгора ставете ги останатите малини (доволно ќе ви бидат 12-15 малини) за декорација.
- Печете го колачот 20 до 25 минути, или додека да добие крцкава кора, а внатрешноста да остане мека.
- Кога ќе се испече, оставете го да се излади, па послужете го.
