Вицепремиерот и министер за транспорт Александар Николоски очекува годинава бројот на патници на скопскиот и охридскиот аеродром да надмине 3,5 милиони, а во следниот период да се достигне и бројката од 4 милиони патници.
Изјавата ја даде по објавувањето на податоците според кои двата аеродрома во првата половина од годината опслужиле речиси два милиони патници. Николоски оцени дека растот е резултат на владините политики во авиосообраќајот и воведувањето на 28 нови авиолинии.
„Денеска излегоа бројките, одлични се, два милиони патници имаме за шест месеци, тоа е раст од над 30 проценти споредено со минатата година. Кога беше избрана оваа Влада бевме нешто над два милиони патници годишно, сега сме два милиони патници за половина година. Минатата година првпат поминавме три милиони патици. Оваа година ќе поминеме 3,5 милиони патници и за многу бргу ќе стигнеме до 4 милиони патници, нешто што беше незамисливо за Македонија. Скопскиот и охридскиот регион се најбрзорастечки во своите категории во регионот, тоа ќе продолжи да биде така. Многу сум горд на оваа политика. Имаме 28 нови дестинации, кризата која беше предизвикана од војната во Заливот скоро и да не се почувствува, а дополнително со керозин од скопскиот аеродром се снабдуваше аеродормот во Приштина, а делумно и аеродромот во Ниш, така што покажавме дека можеме да ги развиваме двата аеродрома и сега одиме на многу повисоки цели“, изјави Николоски.
Од ТАВ Македонија претходно информираа дека Меѓународниот аеродром „Скопје“ и аеродромот „Св. Апостол Павле“ Охрид во првите шест месеци од годинава опслужиле 1.955.648 патници, што е зголемување од 28 проценти во однос на истиот период лани. Реализирани биле 13.167 летови, со раст од 7,6 проценти.
Само во јуни, двата аеродрома опслужиле 374.714 патници, односно 15,6 проценти повеќе во споредба со истиот месец минатата година.
Генералниот директор на „ТАВ Македонија“, Неџат Курт, оцени дека растот на бројот на патници е потврда за развојот на воздушната поврзаност и зголемената доверба на патниците и авиокомпаниите.
Полугодишните податоци покажуваат дека најфреквентна дестинација од скопскиот аеродром останува Истанбул, со 14,2 проценти пазарен удел, по што следуваат Минхен Меминген, Базел Милуз, Дортмунд, Цирих и Франкфурт пренесува прес24.
