Премиерот Христијан Мицкоски верува дека порастот во туризмот од преку 20 проценти во последните четири месеци ќе има позитивен ефект врз државниот бруто домашен производ, стопанскиот развој на земјата, но и ќе донесе повеќе средства за граѓаните. Тој предвидува натамошно зголемување и во идниот период.
“Тоа е добар податок забележан во првите четири месеци од годинава. Добар податок во смисла на тоа дека повеќе од 20 проценти имаме и туристи и ноќевања. Тиа значи и повеќе пари за граѓаните кои им нудат услуги на ове туристи. Тоа значи и дека ако просекот е оти секој од нив во просек оставил по 800 евра надвор од аранжманот тоа се стотици милиони евра кои ќе останат, тука во угостителството, во услужната дејност”, изјави Мицкоски одговарајќи на новинарско прашање по денешната посета на Клиниката за детски болести.
Тој додаде дека како Влада очекуваат уште поголемо засилување и проширување на туризмот во наредниот период, што би резултирало со поголем број туристи и остварени ноќевања. “Обидот директно да преговараме со туроператори е успешен 40 илјади туристи од Западна Европа веќе престојуваат тука, во вкупен број зборувам. Тоа се околку 160 илјади ноќевања, надвор од сезона кога зборуваме за Охрид во другиот дел од државата цела година е сезоната. Следната година очекуваме надвор од сезоната половина милион ноќевања.”
“Разговараме со други туроператори и очекуваме повторно двоцифрен раст на туризмот. Тоа влијае и на БДП и на економскиот раст на државата”, изјави македонскиот премиер. Тој исто така спомена дека минатата година во земјата имало 1,2 милиони туристи, а за годинава се очекуваат до 1,5 милиони. Минатата година биле регистрирани 3,5 милиони ноќевања, а годинава се очекуваат најмалку до 4 милиони ноќевања.
