Од министерството за економија велат формирана е работна група, која треба да направи симулација за ограничување или на цените или на маржите на овие прозиводи. Оттаму додаваат дека во следните денови ќе се прават пресметки за намалување на маржите на 5, 10 или 15 % на трговијата на мало или замрзнување на цените на одредено ниво.
„Предлогот и симулацијата на оваа есенска потрошувачка кошничка ќе биде доставена до Владата на следната владина седница и ќе донесеме одлука за намалување на цените. Оваа есенска кошница во наредниот период ќе продолжи да се применува во вид на божиќна, рамазанска, велигденска потрошувачка кошница со измена на листата на производи кои ќе бидат опфатени во зависност од периодот во кој ќе се применува. “- Министерство за економија.
Дека Владата планира преку пакет мерки да го ублажи ценовниот шок на граѓаните, денеска најави и премиерот Христијан Мицкоски, кој рече дека иако полека но сигурно цените се стабилизирале, а тоа го покажале и последните податоци на статистика, сепак во периодот кој следи ќе се прават анализи и оние прозиводи кои се најкупувани од страна на граѓаните ќе се најдат на листите во кошничките.
„Во периодот кој што следи ќе продолжиме да се грижиме за стандардот на граѓаните, ќе имаме предновогодишна, есенска кошничка во која што ќе има своевиден вид на производи кој што се најупотребувани во тој период од годината, ќе имаме пролетна. Во зависност од тоа какви се потребите на граѓаните ќе го следиме процесот и нема да дозволиме да имаме повторно висока стапка на инфалција со што ќе се влијае негативно на стандардот на граѓаните…..“ -изјави Христијан Мицкоски – претседател на Влада.
Дополнително на 28 септември треба да почне да се применува законот за забрана на нефер трговски практики, со кој се ограничуваат профитните маржи, и се очекува над 2 500 производи да се продаваат по пониски цени. И од Владата и од министерстовто за економија велат законот останува на сила, но доколку како Влада добијат официјално барање од Стопанската комора за одреден период за прилагодување, тогаш премиерот Мицкоски вели спремни се да излезат во пресрет на стопанстовто.
