Во изминатите две години реализирани беа реформи во јавната администрација, кои придонесуваат кон создавање професионални, ефикасни и одговорни институции, за да им се обезбедат поквалитетни услуги на граѓаните. Клучен чекор е донесувањето на Законот за високи раководители, со кој за првпат се воспоставува единствен систем за избор на највисоките раководни позиции преку јавен оглас, јасни критериуми и избор според знаење, компетентност и професионално искуство. Истовремено, се воведуваат механизми за следење на нивната работа и поголема одговорност за крајните резултати – се вели во денешното соопштение од ВМРО-ДПМНЕ, што МИА го објавува интегрално.
Академијата за јавна администрација е носителот на обуките, а преку модернизацијата на Центарот за обука, повеќе од 1.000 административни службеници веќе поминаа обуки и добија пристап до современ електронски систем за учење. Воедно, се унапредуваат системите за управување со човечки ресурси, транспарентноста и процесот на подготовка на законите преку пошироки јавни консултации.
Овие промени значат администрација во која стручноста е на прво место и институции кои ќе работат поодговорно и поефикасно.
Реформите продолжуваат и во наредниот период, со цел да се изгради модерна, професионална и ефикасна јавна администрација.
Извор: МИА
