Денеска стартуваше новата сезона во Втората македонска фудбалска лига. Најубедливата победа на отворањето ја забележа Работнички кој го совлада Кожуф со 3:0, на стадионот „Борис Трајковски“ во населбата, Маџари во Скопје.
Првиот погодок беше дело на Андреј Кудијан во 18. минута по прецизно изведен удар од белата точка. Во 71-та, Аљмир Подграѓа зголеми на 2:0, а конечниот резултат го постави Александар Богданоски со голот постигнат на пет минути пред крајот на мечот.
На стадионот „Билјанини Извори“ во Охрид, домаќинот беше подобар од Новаци со 2:1. Домашниот тим поведе со 1-0 длабоко во продолжението од првиот дел (45+3`) со гол од пенал преку Каланоски кој беше двоен стрелец и за победничкиот гол во 81 минута.
Гостите израмнија преку Марчевски во 73 минута и дадоа надеж но сепак домаќинот ја однесе победата.
Македонија ЃП и Тетекс постигнаа по еден гол за освојување на по еден бод. Гостите од Тетово поведоа со голот на Славчо Мисајловски во 28. минута, а стрелец на единствениот погодок за домаќинот беше Горазд Еминов Блажевски во 68. минута.
АП Брера триумфираше над Еуромилк со 2:0, а головите беа дело на Игор Ристов во 43. и Владимир Жоглев во 72. минута.
Беласица со голот на Рон Мемеди во 79. минута го совлада Осогово додека Детонит Плачковца исто така со 2:0 триумфираше на гостувањето против Шкупи. Гостите поведоа со голот на Давид Голубов во 31-та, а конечниот резултат го постави Филип Димоски во 59. минута.
Првото коло во ВМФЛ ќе се комплетира в недела со дуелот меѓу Пелистер и Камјани, а почетокот е закажан за 20 часот.
Работнички – Кожуф Гевгелија 3:0
Брера Струмица – Еуромилк 2:0
Македонија ЃП – Тетекс 1:1
Шкупи – Детонит Плачковица 0:2
Охрид ГФК – Новаци 2:1
Фото ФФМ/Охридспорт
