Минатиот четврток, во неделата на 46. Интернационален фестивал на филмска камера „Браќа Манаки“, книжевниот клуб UTOPIA во Битола беше домаќин на специјален културен настан посветен на животот и делото на драматургот Горан Стефановски.
Под наслов „Внатрешниот филм“, вечерта ги спои филмот, зборот и меморијата – создавајќи интимно патување низ темите што го обележаа неговиот опус.
Фокусот на вечерта беше документарниот филм „Траги“ на авторките Розе Симоновска и Леа Димитрова, кои беа присутни и лично зборуваа за процесот на создавање, за одговорноста да се пренесе една ваква биографија и за одлуката приказната да се раскаже преку емоции наместо преку класична хронологија.
Со времетраење од 103 минути, филмот ја надмина биографската форма и понуди поетски пристап кон ликот и делото на Стефановски.
Особена тежина на настанот му даде присуството на Игор Стефановски, синот на Горан, кој за прв пат ја посети Битола и сподели лични сеќавања за татко си, неговото детство и корените врзани за градот.
Во официјалниот дел, кој го модерираше Јасмина Атанасовска, писателка која го води книжевниот клуб UTOPIA, зборуваа и актерите Маја Андоновска Илијевски и Борис Чоревски, кои читаа извадоци од драмите на Горан.
Настанот го збогати и присуството на Љупчо Ѓоргиевски, режисер од БНТ, кој зборуваше за четирите театарски претстави што ги поставил според драмите на Горан Стефановски.
Вечерта заврши со дружење и музика, кога Марко Трајков приреди специјален сет составен од музиката на Леб и сол, за која Стефановски напиша своите текстови и од омилените плејлисти со песни на The Beatles, создавајќи мост меѓу неговиот збор и музиката потврдувајќи ја идејата дека делото на Горан Стефановски никогаш не завршува, туку продолжува да живее во мислата на секој што ќе се соочи со неговиот збор.
Фото: Сашо Стојановск
