Во Битола изградени се над пет километри велосипедски патеки, а утврдени се и нови планови за поеколошка, побезбедна, подостапна и поатрактивна урбана средина, изјави градоначалникот Тони Коњановски, на средба со млади велосипедисти, пешаци и претставник на иницијативата „Битола на точак“.
Од секторот за односи со јавност на Општина Битола информираа дека градоначалникот Коњановски, симболично и во знак на поддршка на вело-културата, на работа пристигнал со велосипед.
Во наредниот период, следува доуредување на постоечките патеки, расчистување на теренот, поставување на соодветна вертикална и хоризонтална сигнализација, со што безбедноста и функционалноста ќе бидат значително унапредени. Паралелно, ќе започне и изградба на нови велосипедски рути во делот на поранешната касарна АРМ и други локации низ градот, информираа од тамошната локална самоуправа.
Реконструкцијата на тротоарите на улиците „Васко Карангелевски“ и „Партизанска“ со нови велосипедски патеки, се реализира со средства од буџетот на Општина Битола и претставува проектна активност на проектот Smart4you2, поддржан од Европските фондови.
Фото: Општина Битола
