Се одржа 24. издание на фестивалот „Празник на музиката или „Солстис“ ,традиционална музичка маниефестација во организација на Француската алијанса од Битола, со поддршка од Општина Битола и претставува вовед во 17. издание на Бит фест 2025.
Настанот е дел од светската мрежа на овој франкофонски фестивал познат и како Fête de la musique, односно Празник на музиката и официјален почеток на летото. На овој ден во преку 180 земји во светот каде франкофонијата има свое влијание голем број граѓани и музичари излегуваат на улиците, плоштадите и музицираат, пеат, танцуваат. Во изминатите 23 години овој фестивал со своите преку 100 изведувачи од земјава и странство стана заштитетен знак на Битола,давајќи му на градот медитерански шарм и привлечност.
Историјат- Во октомври 1981 година, Морис Флере стана директор за музика и танц во француското Министерство за култура на барање на тогашниот министер Жак Ланг. Своите размислувања ги применил на музичката практика и нејзината еволуција: „музиката насекаде и концертот никаде“. Кога во студијата за културните навики на Французите во 1982 година открил дека пет милиони луѓе, еден од двајца млади, свират на музички инструмент, тој почнал да сонува за начин како да ги изнесе луѓето на улица. За првпат се одржа во 1982 година во Париз како празник на музиката.
Оттогаш, фестивалот стана меѓународен феномен, кој се слави на ист ден во повеќе од 700 градови во 120 земји, вклучувајќи ги Индија, Германија, Италија, Грција, Русија, Австралија, Перу, Бразил, Еквадор, Мексико, Канада, Соединетите држави и Јапонија.
Годинава Широк сокак повторно ќе биде место на музиката. Почнувајќи со Трио Акустик, познатите изведувачи на традиционална музика „Дуо Зора“, шармантниот шансониер на хармоника Петар, фантастичните танцувачи од Сања денс студио, Мешаниот хор при КУД Стив Наумов, хорот BitVoх и други…Програмата започнува во 20.00 ч. пред платото на споменикот на народниот херој „Стив Наумов“.
