Во Битола се одржа тркалезната маса „Локални мерки за заштита на животната средина во Битола: предизвици и следни чекори“, организирана од Здружението за меѓународна младинска соработка ИНТЕРАКТИВ – Битола, во рамки на проектот: „Зајакнување на локалната отчетност преку граѓански мониторинг во Битола и Кичево“.
Настанот ги обедини претставниците на локалната самоуправа, јавните претпријатија, граѓанскиот сектор и јавноста, со цел да се поттикне отворен дијалог за спроведувањето на локалните политики во областа на животната средина, како и за предизвиците и можностите за нивно унапредување.
Во фокусот на дискусијата беа две значајни мерки од Програмата за животна средина на Општина Битола за 2026 година: изработката на Стратегија за развој на урбаното зеленило и поставувањето на подземни садови за отпад. Учесниците разговараа за значењето на овие мерки за подобрување на квалитетот на урбаниот простор, заштитата на животната средина и создавањето поздрави услови за живот на граѓаните.
Во своето обраќање, градоначалникот на Општина Битола, Тони Коњановски, информираше дека Општината е во фаза на подготовка на техничка спецификација за распишување јавна набавка за избор на изработувач на Стратегијата за развој на зеленилото. Тој нагласи дека овој стратешки документ ќе биде основа за планирање, заштита и унапредување на системот на урбано зеленило, како и важен сегмент при изработката на идните урбанистички планови.
Коњановски се осврна и на Зелениот катастар на Општина Битола, кој претставува современ систем за евиденција, управување и мониторинг на зелените површини и урбаната дендрофлора.
Во рамки на тркалезната маса беа презентирани и чекорите за граѓански мониторинг на општинската програма, при што беше истакната важноста од редовно следење на реализацијата на мерките и транспарентно информирање на јавноста.
На панел-дискусијата учествуваа градоначалникот на Општина Битола, Тони Коњановски, директорот на ЈП „Комуналец“ – Битола, Горан Степановски, претставникот на Здружението „Геосфера“ – Битола, Тони Гештаковски, претседателката на Организацијата на жени на Општина Битола, Светлана Петковска, како и проектниот монитор Целе Јовевски. Настанот го модерираше претседателот на ИНТЕРАКТИВ – Битола, Мартин Николовски.
Организаторите истакнаа дека преку вакви јавни дискусии се зајакнуваат транспарентноста, отчетноста и соработката помеѓу институциите, јавните претпријатија, граѓанските организации и граѓаните, со цел креирање поквалитетни локални политики и унапредување на животната средина во Битола.
Тркалезната маса е активност во рамките на швајцарскиот проект „Програма за поддршка на изборите“, имплементиран од Меѓународната фондација за изборни системи (ИФЕС). Содржината и изнесените ставови се одговорност на организаторот и не мора да ги одразуваат ставовите на Владата на Швајцарија и на Меѓународната фондација за изборни системи (ИФЕС).
