Со отворање на археолошката изложба „Златниот антички наод од село Тремник, Неготино”, почнува ново издание на Демирхисарско културно лето.
Според програмата, планирани се креативни работилници за „one minute video” што ќе се одржат во рамки на фестивалот за децентрализирана култура Блендер 2025, научни предавања во рамки на 8-мото издание на Демирхисарската летна школа, а ќе се одржат и традиционалните манифестации, информираа од тамошната локална самоуправа.
-Во текот на летниот период ќе се одржат Демирхисарска летна школа, поетските манифестации „Славко Крстевски” и „Манастирско поетско ехо”, музичката манифестација „Рок Хепенинг”, манифестацијата „Илинден” во Смилево, а предвидени се и гостувањата на фолклорни ансамбли од земјата и странство, театарски претстави, стенд ап комедии, изложби, промоции на книги, џез концерти и други културни настани, соопштија од Општина Демир Хисар.
Културните настани и манифестации се во организација на Домот на културата „Илинден”-Демир Хисар и во соработка со уметници, организации и културни институции, а поддржани се од Општина Демир Хисар.
Фото: Општина Демир Хисар
