– Пролетната сеидба во битолскиот дел на Пелагонија е во тек, а во фокусот на земјоделците се житните и индустриските култури.
Во изјава за МИА, раководителот на подрачната единица на Министерството за земјоделство, шумарство и водостопанство, Стојан Христовски, истакна дека земјоделците најдоцна до 30 април треба да ги искористат доделените картички за набавка на т.н. „зелена нафта“.
-Оваа пролет во битолскиот дел на Пелагонија планирано е да се посејат 5.200 хектари со житни култури. Пролетната сеидба почна и досега посадени се 800 хектари со пченка. Според планот, земјоделците треба да посејат и индустриски култури кои ќе бидат на површина од 8.400 хектари, а од нив 2.100 хектари ќе бидат со сончоглед. Важно е земјоделците да не заборават дека важноста на картичките за набавка на „зелена нафта“ истекува за неколку денови, односно треба да ги искористат најдоцна до 30 април, нагласи Христовски.
Од подрачната единица на Министерството за земјоделство, шумарство и водостопанство со седиште во Битола потврдија дека над 90 насто од земјоделците подигнале картички за „зелена нафта“ чија употреба завршува на крајот од овој месец.
Миа
