За отприлика една недела се очекуваат првите огласи за вработување со што ќе се ефектуира Оперативниот план со мерки за вработување. Главен акцент е на младите. Оперативниот план како најголем и најобемен досега, беше претставен во Прилеп пред младите и невработените лица.
Според Весна Пешева, заменик директор на Агенцијата за вработување оперативниот план тежок 40 милиони евра треба да помине на одобрување на Комисијата за заштита на конкуренцијата и ќе биде ефектуиран.
-Опфатени се преку 16 000 невработени, а планот тежок 40 милиони евра, најобемен досега, носи мерки за потребите на пазарот на трудот. Има мерки за директни вработувања има и обуки за вработливост. Младите се опфатени со 40 проценти, жените со 50, а со 5 проценти се оние од ранливите категории од ромската заедница. Веќе ги очекуваме првите огласи кои ќе бидат објавени во најскоро време, веднаш по добивањето на мислењето од КЗК. Потоа ќе ги објавнуваме и другите огласи етапно за што, ние како Агенција, однапред подготвуваме план и распоред за динамика на реализација. Подготвени се сите 30 центри за вработување. Овој оперативен план содржи мерки кои, главно се насочени спрема младите до 29 години чие учество е најмалку 40 проценти, рече Пешева.
Агенцијата за поддршка на претприемништвото се вклучува со обуки, а некои и за првпат се спроведуваат годинава.
-Од оваа година, за првпат, Агенцијата си ја зема обврската да ги земе обуките за претприемништво, како и менторството, вели в.д директорката на Агенцијата за поддршка на претприемништвото, Даниела Димовска.
Заменик министерот за економија и труд Марјан Ристески нагласува дека приоритет се младите и кампањата за оперативното план ќе се спроведува во сите градови во државава.
-Според законската регулатива, мора да го почекаме мислењето на Комисијата за заштита на конкуренцијата, па од наредната недела ќе има огласи и започнување на мерка по мерка за што јавноста ќе биде известена. Во оваа пригода сакам да ги повикам сите категории невработени лица, посебно младите да ги следат огласите за вработување на веб страниците на АВРМ, на Министерството за економија и труд и во Агенцијата за претприемништво и навремено да аплицираат, нагласи Ристески.
Основен услов е невработените да бидат активни баратели на работа. Ќе се спроведе кампања во сите градови. Инаку, во моментов во земјава се околу 93 000 невработени од кои 17 проценти се млади.
Фото извор МИА
