Програмата за развој на Обединетите нации (УНДП) во партнерство со Делегацијата на Европската Унија и Општина Ресен промовираа програма за одржлив туризам во Преспа како дел од интегралната програма „ЕУ за Преспа“.
Со потпишаниот Меморандум за соработка меѓу УНДП, Општина Ресен и двата национални парка, „Галичица“ и „Пелистер“ се овозможува заеднички потфат, односно обележување и уредување на 100 километри велосипедски патеки и 70 километри пешачки патеки, кои ќе поминуваат низ заштитени подрачја во Преспа.
-Заедно со вклучените партнери работиме на реализацијата на заедничката визија за Преспа — како уникатна туристичка дестинација со заштитена животна средина и активни, „зелени“ заедници. Низ отворените три повици за поддршка за нови сместувачки капацитети, иновативни туристички поизводи и сервиси и обезбедување експертски обуки и тренинзни за сите заинтересирани во туризмот, сметаме дека Преспа добива нов развоен импулс со одржливи еко зелени практики, истакна постојаниот преставник на УНДП, Армен Григорјан.
На свеченоста во Ресен, градоначалникот Јован Тозиевски ја нагласи уникатноста на проектот што денеска почна да се реализира кој според него обезбедува напредок на Преспа.
-Овој голем проект обезбедува напредок за Преспа. Денеска повторно сме уникатни како што цела Преспа е уникатна со езерото и националните паркови. Со овој проект почнуваме нова приказна и ќе мотивираме многу други за да дојдат во Преспа и да ги видат убавините на овој регион. Веруваме во развиена и прекрасна општина, посочи Тозиевски.
Јавна поддршка на проектните активности во Преспа што се во функција на одржливиот туризам искажаа директорите на националните паркови „Галичица“ и „Пелистер“.
Директорката на Национален парк „Галичица“-Ресен, Фросина Георгиевска истакна дека со меморандумот се формирализира изградбата на пешачки и велосипедски патеки, се збогатува туристичка понуда за сите посетители во националниот парк и се врши поврзување на трите заштитени подрачја во Преспа, додека пак директорот на Национален парк „Пелистер“-Битола, Иванчо Тошевски, порача дека Преспа треба да е центарот на сите идни туристички понуди и дека за развој на туризам треба регионално да се размислува, затоа што како што рече Тошевски, светот се отвора.
Проектот „ЕУ за Преспа“ овозможува одржливо управување и користење на природните ресурси во преспанскиот регион, со цел подобрување на квалитетот на живот и економски развој преку нови „зелени“ патишта во земјоделството и туризмот. Со објавување на три отворени повици наменети за различни чинители од областа на туризмот ќе може да се вршат интервенции што ќе се реализираат до јуни 2027 години и ќе бидат во висина до еден милион долари.
Фото: МИА
