Во Битола на 3 септември ќе се одржи панел-дискусијата „Гласната тишина“, посветена на семејното насилство во семејства во кои живее лице со аутистичен спектар. Настанот ќе започне во 18 часот во салата на кино „Манаки“.
Организатор е Здружението на психолози за стручна и морална поддршка на деца и возрасни „Рилука“ – Битола, а целта е да се отвори професионален и јавен разговор за тема за која, како што посочуваат организаторите, премногу често се молчи.
Фокусот ќе биде ставен на раната превенција и препознавањето на ризиците, психолошката и социјалната поддршка на семејството, заштитата на лицата со аутистичен спектар, како и потребата од координирана реакција на институциите и стручните служби.
„Аутизмот не е причина за насилство. Сепак, комплексните потреби, хроничниот стрес, исцрпеноста, финансискиот и емоционалниот товар и недостатокот од соодветна поддршка можат да придонесат кон зголемен ризик од семејна криза. Разбирањето на причините не значи оправдување на насилството. Разбирањето е предуслов за превенција“, порачуваат организаторите.
Настанот ќе започне со проекција на краткометражен филм кој ги обработува семејните односи во семејство со лице со аутистичен спектар, насилството и неговото влијание врз детето.
Потоа ќе следува панел-дискусија посветена на психолошкото насилство во семејството, со посебен акцент на децата со атипичен развој. Ќе се разговара за препознавањето на невидливите форми на насилство, последиците врз развојот и благосостојбата на децата, улогата на семејството и одговорноста на институциите и заедницата.
На панелот ќе учествуваат стручни лица од повеќе области – психолози, специјален едукатор и рехабилитатор, психотерапевт, полициски инспектори за семејно насилство и малолетничка деликвенција, претставник од Центарот за социјална работа, педијатар и адвокат.
Меѓу учесниците се: Драгана Кирковска, Елеонора Серафимовска, Маргарита Николовска, Наташа Бекирова, Бети Бошкова, Зана Богоевски, Марина Ѓорговска, Марија Димовска и Мартина Ристеска-Златевска.
По завршувањето на панел-дискусијата е предвиден коктел за присутните и можност разговорот да продолжи во неформална атмосфера.
„Насилството не секогаш остава видливи траги. Понекогаш се крие во стравот, молкот, променетото однесување, постојаната напнатост и чувството дека никој не слуша. Нашата цел не е само да зборуваме за тоа што се случува кога насилството веќе постои, туку и да се прашаме што можеме да направиме пред да стигнеме до таму“, велат од „Рилука“.
Настанот е поддржан од Општина Битола, Фондацијата „Д-р Верица Механџинска“ и Комората на психолози.
