Министерството за земјоделство, шумарство и водостопанство, по барање на ЈП „Национални шуми“, даде согласност за воведување на целосна забрана за движење во шумите и шумското земјиште. Ваквата согласност е издадена поради зголемена опасност и превенирање од појава на шумски пожари на отворен простор.
Целосната забрана за движење во шумите и шумското земјиште се воведува на територијата со која стопанисува ЈП „Национални шуми“ и истата започнува денеска, а ќе трае до денот на нејзиното отповикување, односно до проценката дека ризикот од шумски пожари е намален.
Движењето во шумите ќе биде дозволено единствено со писмено одобрување издадено од страна на подружниците на „Национални шуми“ за подрачјето со кое управуваат.
За непочитување на оваа целосна забрана за движење во шумите и шумското земјиште, на физички лица кои ќе бидат затекнати ќе им се изрече глоба од 1.500 до 2.000 евра во денарска противредност.
