Виенската филхармонија во салата „Музикферајн“ (дом на Виенската филхармонија) го одржа својот традиционален новогодишен концерт на 1 јануари, со бројни гости од целиот свет во салата, а се пренесуваше во над 90 земји пред милионски аудиториум . Со овој омилен празничен настан за светската публика диригираше славниот германски диригент Кристијан Тилеман. Тилеман ужива особено блиско и продуктивно уметничко партнерство со Виенската филхармонија. По 2019 година, ова беше втор пат тој да диригира со престижниот настан на кој беа изведени многу дела од богатиот опус на браќата Штраус и премиерно дело – Квадрилот на Антон Брукнер, во чест на 200 години од неговото раѓање.
Златната сала „Музикферајн“ беше украсена со 30 илјади цвеќиња од Одделот за паркови и градина на Виена.
Утринскиот Новогодишен концерт од Виенската филхармонија чиј директен пренос секоја година го врши МТВ, е навистина прекрасен настан за почеток на новата година, кој традиционално се одржува од 1939-та година и е нешто што ни го разубавува почетокот на новата година веќе долго време, барем откако се пренесува на телевизиите. Концертот нестрпливо го очекуваат дури и оние кои не се големи љубители на класичната музика и знаат да заплескаат на традиционалниот завршеток во ритамот на Маршот Радецки од Јохан Штраус, кој за првпат е изведен во 1945 година, а по неколку години станува задолжителен дел од бисот и крајот на концертот.
И годинава, повторно бевме сведоци на новогодишните разгледници во вид на прекрасни балетски точки, кореографија и костимографија- спој на класичното и модерното и чудесните зелени градини и замоци во близина на Виена, како сценографија, во изведба на Виенската државна опера и балет.
Престиж е да се биде дел од публиката, анонимни и славни гости од политичкиот живот, а на дел од нив не им е проблем и стоечки да го проследат гала настанот, за чии влезнци се чека по три години.
