Фестивалот започнува таму каде што срцето најсилно чука – на Широк Сокак.
Утре, на 26 јули, со почеток во 18:30 часот, од плоштадот Магнолија до платото пред Офицерски дом ќе се одржи големото дефиле на сите домашни и странски учесници на 55. издание на фестивалот „Илинденски денови“.
Овој спектакуларен настан на отворено го означува официјалниот старт на фестивалот, кој веќе неколку дена пулсира низ Битола преку својата офф програма.
Со илјадници чекори, шарените народни носии и знамиња од цел свет ќе донесат вистинска магија на улиците на градот.
Во дефилето ќе учествуваат гости од странство, како и бројни македонски културно-уметнички друштва, создавајќи жива мапа на светската традиција.
Граѓаните се поканети да го проследат дефилето, да ги подигнат погледите, да ја почувствуваат музиката и со аплауз и насмевки да ги поздрават сите учесници како вистински домаќини.
Битола уште еднаш ќе покаже дека е голема светска сцена, каде што народната уметност е главниот актер.
„Илинденски денови“ ја продолжуваат својата традиција и оваа година, по 55. пат, претворајќи го градот во вистински празник на културата и фолклорот.
