По денешниот дебакл и испаѓањето во Втората лига, комплетниот стручен штаб и раководството на клубот поднесоа оставки.
Градоначалникот на Битола, др-Тони Коњановски, по поразот на ФК Пелистер и испаѓањето во Втората македонска фудбалска лига, со својата објава, напиша дека неуспехот на ФК Пелистер претставува големо разочарување за навивачите и за љубителите на фудбалот во градот и пошироко.
„Денес е тежок ден за спортот во Битола. Поразот на ФК Пелистер во Кавадарци не разочара сите битолчани, особено поради тоа што клубот со овој неуспех заминува во Втора лига“, наведува Коњановски.
Тој информираше дека ќе ја прифати оставката на стручниот штаб, техничкиот директор и најави целосна ревизија на досегашното работење. Според него, ревизијата треба да даде јасна слика за состојбите во клубот и да создаде основа за нов почеток со нови планови и нови кадри кои ќе работат на враќање на Пелистер на победничките патеки.
„Веднаш ќе побарам да се изврши ревизија на досегашното работење за да може да се продолжи напред со јасна слика, нови планови и нови кадри кои ќе го водат клубот кон победи и резултати на кои сите ќе бидеме горди“, пишува градоначалникот на Општина Битола.
Тој исто така порача дека Фудбалскио Клуб – Пелистер бил и мора да остане спортска гордост на Битола, нагласувајќи дека за враќање на клубот на вистинскиот пат ќе биде потребна максимална посветеност од сите – од локалната самоуправа и раководните структури до фудбалерите на теренот. Тој оцени дека актуелниот неуспех треба да биде сериозна поука и можност за анализа на пропустите, со цел во иднина клубот да биде подобро организиран и поконкурентен.
„Овој пораз мора да ни даде насоки каде сме згрешиле и каде треба да бидеме подобри, во интерес на ФК Пелистер и во интерес на Битола“, завршува Коњановски.
Клупско соопштение во продолжение во кое комплетното раководство поднесува оставка.
„ФК Пелистер ја известува јавноста дека, по денешниот пораз и испаѓањето на клубот од Првата македонска фудбалска лига, претседателот на клубот, заедно со целокупната управувачка структура, техничкиот директор и целиот стручен штаб, ќе поднесат оставки до градоначалникот на Општина Битола, преземајќи морална одговорност за остварениот резултат. Во изминатиот период беа преземени бројни активности и направени значителни напори за зајакнување на клубот и обезбедување на негов опстанок во Првата лига, но очигледно вложеното не беше доволно за постигнување на посакуваните резултати. Покрај поднесените оставки, досегашната управувачка структура бара да се спроведе и целосна ревизија на досегашното работење на клубот, со цел јавноста да биде ослободена од какви било сомнежи во однос на евентуални злоупотреби на финансиски средства и да се потврди нивното наменско и транспарентно трошење. Со овој чин се презема одговорност за резултатите, но и се остава простор за темелна анализа на досегашните чекори и носење на нови одлуки, сè во интерес на идниот развој и напредок на ФК Пелистер“, се вели во соопштението на ФК Пелистер.
