Штрајкот на работниците низ цела Грција го запре транспортот и јавните услуги, бидејќи синдикатите протестираа против планираните реформи во трудот што би овозможиле подолго работно време во приватниот сектор, објави Ројтерс утрово.
Штрајкот ги остави бродовите заглавени во пристаништата, а железничките услуги целосно суспендирани.
Ова е втор голем протест овој месец, организиран од најголемите синдикати во јавниот и приватниот сектор во Грција – ADEDY и GSEE.
Планирано е демонстрациите да се совпаднат со парламентарната дебата и гласањето за нацрт-законот за реформи во трудот.
Лекари од болницата и новинари од јавниот сектор исто така учествуваат во штрајкот, а се очекува протестниот марш да стигне до парламентот денес напладне по локално време.
Владиниот нацрт-закон предвидува работодавачите да можат да го продолжат работното време, да добијат поголема флексибилност во краткорочното вработување, како и нови услови за годишен одмор во приватниот сектор.
Владата тврди дека реформите ќе го модернизираат пазарот на трудот и ќе ги заштитат вработените од отпуштање доколку одбијат да работат прекувремено.
Сепак, синдикатите предупредуваат дека предлогот ги крши правата на работниците, го укинува осумчасовниот работен ден и го ослабува колективното договарање, додека платите остануваат меѓу најниските во ЕУ.
„Наместо да ги зголемува приходите на работниците и да ги зајакнува јавните услуги, владата законски воведува можност за работа за повеќе работодавци и исцрпувачко работно време“, велат синдикатите ADEDY и GSEE.
Според Евростат, куповната моќ на Грците останува меѓу најниските во Европската Унија, и покрај растот на платите и намалувањето на невработеноста по кризата од 2009 до 2018 година пренесува проверено.
