Грција започна со поставување пловечки заштитни бариери на плажите поради ширењето на опасната отровна зајак – риба во Медитеранот. Локалните власти во Халкида велат дека мерката треба да ја зголеми безбедноста на капачите, особено на децата.
Грчкиот Црвен крст предупреди дека каснувањето од оваа риба може да предизвика тешки повреди и силно крварење, а нејзиното месо е опасно за јадење поради смртоносен невротоксин. Планирано е поставување на повеќе километри заштитни мрежи во заливите, а примерот веќе го следат и други општини.
Научниците сметаат дека ширењето на инвазивниот вид е последица на затоплувањето на Медитеранот и неговото навлегување преку Суецкиот канал. Грчката влада воведе награда за улов на опасната риба, а рибарите ќе добијат и субвенции за да се намали нејзината бројност. Иако дел од научниците предупредуваат на ризиците, други сметаат дека нападите врз луѓе се многу ретки и најчесто се случуваат само ако рибата биде испровоцирана. Локалните власти, сепак, инсистираат дека превенцијата е неопходна за да се обезбеди безбедно лето за туристите и жителите.
