Дванаесетгодишниот Максим, дел од подмладокот на тимот на „Бахус Класик“ освои прво место во својата класа (микро автомобили“ на престижниот Меѓународен олдтајмер настан што се одржа во Швенцинген, Германија.
Максим е најмладиот учесник на овој настан, а успехот го постигна со возилото MOPI произведено од SAP Karoserija Ljubljana во 1947 година. Во моментов во цела Европа има само две рестарвирани вакви возила.
Возилото е произведено при крајот на 40-те и почетокот на 50-те години во поранешна Југославија во серија од 30 примероци во соработка со Tomos, како пионерски возила за младинци на возраст од 12 до 16 години. Возилото е со зафатнина од 49 кубни сантиметри, има рачен менувач со три брзини и максимална брзина од 30км/ч.
– Максим како најмлад учесник во историјата на овој настан со само 12 години, го освои првото место во својата класа (Микро Автомобили) и со тоа стана првиот Македонец во историјата на нашата држава кој успеал да стигне до подиум на ваков престижен настан, велат од тимот на „Бахус класик“ во изјава за МИА.
Тимот на „Бахус класик“ веќе втора година учествува на овој настан на олдтајмери којшто традиционално се одржува во барокниот дворец во Швенцинген. Традиционално, и годинава тимот на Бахус класик покрај олдајмерите, ги презентираше и македонските вина и убавините на Македонија.
Во пресрет на „Бахус класик релито“ што ќе се вози во Македонија при крајот на септември беше организирано и извлекување со кое еден учесник доби бесплатно учество на релито. Станува збор за Jean Hansen од Луксембург со возилото Lagonda 2L Blower од 1931година.
На настанот во Швенцинген, што се одржа изминатиот викенд, учествуваа 180 специјално избрани луксузни олдтајмери од целиот свет кои беа оценети од меѓународно 25-члено жири.
Фото: Бахус класик
