Таксите се воведуваат со цел да се растерети метежот на островите.
Од 1 јули, најпознатите грчки острови Санторини и Миконос ќе започнат да наплаќаат нова туристичка такса во износ од 20 евра по патник. Мерката ќе се применува во текот на најинтензивната туристичка сезона, а целта е да се ублажат последиците од масовниот туризам, кој веќе сериозно го оптоварува локалниот живот и инфраструктурата.
Иако годинава се очекува пораст на авионски пристигнувања за околу 7 проценти, најголемиот дел од туристите ќе се насочат кон Атина и Солун. Островите во Егејското Море, особено Санторини, Миконос и Парос, веќе го достигнуваат својот капацитет и повторно се отвора прашањето дали треба да се воведат ограничувања за изградба на нови сместувачки капацитети.
Според проценките, бројот на туристи на островите оваа година ќе остане на слично ниво како и во изминатите три години. Сепак, туристичкиот сектор предупредува дека понатамошниот развој е можно само ако се инвестира во инфраструктурата – снабдување со вода, канализација, уличен сообраќај, паркинг и општа патна мрежа.
„Санторини и Миконос се третираат како бисери на грчкиот туризам, но немаат никакви инфраструктурни вложувања. Без нови пристаништа и подобрени услови, не можеме да зборуваме за стратешки развој“, изјави Антонис Пагонис, претседател на Здружението на хотелиери на Санторини.
Хотелиерите бараат приходите од таканаречената „такса за отпорност“, која носи околу 500 милиони евра годишно во државната каса, да бидат пренасочени директно кон проекти за одржлив туризам. На последниот регионален конгрес на Панхеленската унија на хотелиери беше упатен апел до владата да обезбеди реална поддршка за најоптоварените дестинации, со цел да се зачува нивната автентичност и да се обезбеди квалитетно туристичко искуство.
