Секоја година на 7 јули, интернетот е полн со фотографии од разно чоколадо во чест на Светскиот ден на чоколадото, но дали некогаш сте се запрашале зошто токму 7 јули и кој одлучил дека ова е денот за прославување на сè што е поврзано со чоколадото?
Сè започнало во 1550 година
Светскиот ден на чоколадото се одбележува од 2009 година, а 7 јули е избран затоа што се смета дека е годишнина од воведувањето на чоколадото во Европа во 1550 година. Пред тоа, чоколадото се пиело, се обожавало и се користело како валута во Мезоамерика илјадници години.
Се смета дека Олмеците, една од најраните познати цивилизации во Мезоамерика, биле првите што го претвориле растението какао во пијалок, користејќи го во ритуали и како лек. Маите го однеле ова чекор понатаму, нарекувајќи го какаото – храна на боговите. Ацтеките користеле зрна какао како валута.
Ова било свет во кој чоколадото се сметало за нешто свето, лековито и вредно – не како обичен сладок десерт.
На крајот, шпанските истражувачи наишле на какаото, по што, сосема разумно, дошле до заклучок дека луѓето во Европа треба да знаат за оваа неверојатна храна на боговите, па веднаш тргнале да земат и за дома.
Никој не знае кој го измислил денот
За разлика од многу меѓународни прослави, Светскиот ден на чоколадото се чини дека нема ниту еден официјален основач или управно тело, се чини дека се појавил органски, добивајќи популарност со текот на времето.
Здравствени придобивки од чоколадото
Чоколадото има и некои здравствени придобивки ако се консумира без додаден шеќер и во умерени количини. Го зголемува нивото на серотонин и допамин, што помага да се подобри расположението.
Темното чоколадо е моќен извор на антиоксиданси, а исто така помага и во подобрување на протокот на крв, намалување на крвниот притисок и намалување на ризикот од срцеви заболувања.
Инаку, Европејците, кои за првпат пробале чоколадо во 16 век, сега јадат повеќе чоколадо од остатокот од светот. Интересно е што жителите на Швајцарија, Велика Британија и Германија јадат просечно 11 килограми од оваа намирница годишно.
извор: слободен печат
