Православните верници денеска го слават Свети Јеремија, еден од поголемите пролетни празници во народниот календар. Обичаите и верувањата поврзани со овој ден традиционално се во функција на магиска заштита од змии, гуштери и други влекачи.
Во народните песни што се исполнуваат за време на овие обичаи, Јеремија е претставен како митски јунак. Ова покажува дека, иако во основата на празникот е споменот на старозаветниот пророк, обичаите и верувањата водат потекло од најдалечното минато на човештвото.
Светиот пророк Јеремија живеел шест века пред Исус Христос, а роден е во малото село Анатот во близината на Ерусалим. Уште како дете го слушнал гласот на Бога кој му одредил да биде пророк. Иако Јеремија првично се оправдувал со тоа што е уште мал, сепак не можел да ја одбие Божјата заповед.
Во времето на неговиот живот, моралот на Евреите бил паднат на многу ниско ниво, а замав зело идолопоклонството. Поради појавата на многу лажни пророци, народот тргнал по погрешен пат, по што Јеремија претскажал дека ако не се откажат од пороците, ќе ги стигне божјата казна.
Тој на Евреите им претскажал 70-годишно ропство под Вавилон, што набргу се остварило кога царот Навукодоносор го нападнал, разурнал и покорил Ерусалим. Меѓу оние што го оплакувале разурнатиот град бил и самиот пророк, со што настанала познатата „Книга плач Еремиин”. Светиот пророк, меѓу другото, претскажал и дека кога ќе се роди Исус, многу деца ќе настрадаат.
Подоцна Јеремија бил протеран во Египет, во градот Мисир, каде што по четири години бил каменуван од своите сонародници и го завршил животот. Преданието раскажува дека Александар Македонски за време на својот поход ги пренесол неговите мошти во Александрија.
