Денес, пчелите опрашуваат над 80 проценти од земјоделските култури и имаат влијание врз производството на приближно една третина од храната на целата планета.
Освен тоа, без пчели не само што ќе отсуствува опрашување на културите од кои зависи исхраната на луѓето, туку и на дивите, некултивирани растенија, кои придонесуваат за одржување на биодиверзитетот и синџирот на исхрана во природата. Дивите, некултивирани растенија кои растат во природата придонесуваат за зачувување на екосистемот и синџирот на исхрана, а исто така се опрашуваат од пчели.
Намалениот интерес на пчеларите за чување и одгледување пчели, автоматски ќе значи помалку пчели, послабо опрашување и помалку храна за целата планета. Ова се само некои од најновите сознанија на глобално ниво во пресрет на овогодишниот Светски ден на пчелата, 20 Мај, чие мото е “Пчелите инспирирани од природата да нè хранат сите”.
Според експертите, пчелите и останатите опрашувачи се неопходни за човековото постоење. Благодарение на над 20 000 видови пчели и разни други диви опрашувачи, се опрашуваат растенија кои ја сочинуваат основата на човековата исхрана. Опрашувачите сериозно ја потпомагаат одржливоста на земјоделството и биодиверзитетот.
Меѓутоа, губењето на живеалиштата, неодржливите земјоделски практики, климатските промени и загадувањето го загрозуваат здравјето и опстанокот на различните видови опрашувачи. “Загадувањето на животната средина е еден од факторите кои негативно влијаат на пчелите, но не само во однос на нивното труење. Со зголемување на нивото на јаглерод диоксид во воздухот, се намалува нивото на протеини во поленот. Во делови од светот каде загадувањето е максимално и каде јаглерод диоксидот е во огромни количини во воздухот, има помалку протеини, иако има изобилство полен. Ова не е доволно за квалитетно хранење на пчелите”.
Експертите наведуваат дека пчелата стана главен опрашувач, бидејќи луѓето користејќи пестициди во земјоделството ги уништија сите диви опрашувачи кои ги опрашувале растенијата заедно со пчелите. Тие додаваат дека повеќе од 200 000 животински видови се опрашувачи, од кои огромното мнозинство се диви, вклучувајќи пеперутки, птици, лилјаци и повеќе од 20 000 видови пчели.
Македонија и годинава се приклучува кон одбележувањето на Светскиот ден со посебен настан што го организираат хуманитарната и развојна организација АДРА Македонија, Амбасадата на Република Словенија и Факултетот за земјоделски науки и храна (ФЗНХ) заедно со децата од градинките на општина Гази Баба и студентите од ФЗНХ. Предвидена е богата програма за сите генерации, но и отворање на првиот Парк на пчелата.
“Прославата на Светскиот ден ќе фрли светлина врз виталните улоги на пчелите и другите опрашувачи во обновата на екосистемите, зачувувањето на биолошката разновидност и безбедноста на храната и исхраната. Ова е можност да ги засилиме нашите напори за заштита на пчелите и другите опрашувачи. Со тоа можеме да ги ублажиме ризиците од недостаток на храна, неодржлив земјоделски сектор и нарушен биодиверзитет”, информираат организаторите.
По повод Светскиот ден на пчелата, Амбасадата на Словенија во соработка со АДРА Македонија објави и тематски квиз наменет за учениците од основните училишта, а најдобрите познавачи на пчелите ќе бидат наградени токму на овој настан. Иницијативи за заштита на опрашувачите се спроведуваат низ целиот свет, преку воведување иновативни земјоделски политики, едукативни кампањи, иницијативи за пошумување со медоносни растенија, натпревари за најдобри фотографии, итн. Тој тренд го следи и земјава.
