Цените на нафтата повторно бележат раст, а причината е зголемената неизвесност околу глобалното снабдување. Инвеститорите со внимание ги следат случувањата на Блискиот Исток, откако Иран објави нацрт-предлог кој предвидува ограничувања за пловидбата низ Ормутскиот Теснец – една од најважните поморски рути за транспорт на нафта во светот.
Во текот на денешното тргување, европската референтна нафта „брент“ за испорака во октомври поскапе за 1,25 проценти и достигна цена од 83,52 долари за барел. Истовремено, американската сурова нафта WTI за септемвриска испорака забележа раст од 1,10 проценти, достигнувајќи 78,14 долари за барел пренесува прв.мк
Според предложениот ирански план, на американските и израелските бродови би им било забрането да минуваат низ Ормутскиот Теснец. Во документот се наведува и можност за ограничување на пловидбата и за други земји за кои Техеран смета дека му нанеле штета, сè додека не биде исплатен соодветен надомест.
Во меѓувреме, медиумите објавуваат дека Иран и Оман работат на можен договор со кој би се регулирале пловните рути низ теснецот, иако засега нема официјална потврда дека е постигнат конечен договор. Според предлогот, бродовите што влегуваат во Персискиот Залив би се движеле низ иранските територијални води, додека оние што излегуваат би пловеле низ водите на Оман.
Дополнителен притисок врз цените создадоа и украинските напади врз две големи руски рафинерии – Јарославската, позната како Јанос, и постројката Новоил, која работи во состав на Башнефт. Овие случувања дополнително ги засилија стравувањата дека би можело да дојде до нарушување на снабдувањето со нафта на светскиот пазар.
Во исто време, анализата на UOB покажува дека американскиот увоз на сурова нафта од Саудиска Арабија во јули паднал на нула, што е прв ваков случај уште од 1985 година.
Растот на цените на енергенсите повторно ги отвори прашањата за можни нови инфлациски притисоци, особено поради нестабилната безбедносна ситуација на Блискиот Исток.
Неизвесноста дополнително ја поттикнуваат и различните пораки околу дипломатските напори поврзани со Ормутскиот Теснец. Американскиот претседател Доналд Трамп изјави дека верува оти конфликтот со Иран би можел да заврши „прилично наскоро“, додека од Техеран возвратија со обвинувања дека станува збор за „театарска дипломатија“, што дополнително ја одржува неизвесноста на светските пазари.
