Православните верници денеска го чествуваат споменот на Светиот Јаков Зеведеев, еден од дванаесетте големи апостоли на Исус Христос. Како брат на Јован Богослов, тој беше меѓу првите кои ги оставија рибарските мрежи за да тргнат по патот на Спасителот.
Јаков се вбројува меѓу тројцата најблиски ученици на кои Господ им ги откриваше најголемите тајни, вклучувајќи го Преображението на Тавор и молитвата во Гетсиманската градина. По примањето на Светиот Дух, тој го ширеше христијанството низ многу краишта, стигнувајќи дури до Шпанија.
Светите преданија бележат дека по неговото враќање, Евреите не можејќи да го победат во расправите, го обвинија пред Ирод. Заедно со него, на смрт беше осуден и неговиот клеветник Јосија, кој во последен миг се покаја гледајќи го достоинството на апостолот.
„Мир на тебе и прошка!“, му рече Јаков на Јосија пред двајцата да бидат погубени со меч.
Свети Јаков пострада во 45-тата година во Ерусалим. Неговите мошти денес почиваат во Шпанија, каде според верувањата, на неговиот гроб сè уште се случуваат чудесни исцеленија.
