Со овој ден е поврзан и еден вековен обичај што некои верници и денес го почитуваат
Македонската православна црква – Охридска архиепископија и православните верници денеска го чествуваат споменот на Светиот свештеномаченик Терапонт, епископот Сардиски.
Како голем заштитник на верата кој многумина преобратил во христијанството, овој светител поминал низ нечовечки мачења. Токму затоа и неговиот ден со векови е поврзан со силни народни верувања и обичаи кои нашиот народ строго ги почитува и тоа уште од раните утрински часови.
Свети Терапонт живеел во третиот век, а поради неговата силна проповед бил затворен, изгладнуван и сурово тепан по наредба на тогашните пагански власти. Според преданието, тој бил соблечен гол, положен на земја и врзан за четири суви колци, по што бил немилосрдно тепан сè додека месото не му било одвоено од коските.
Но, наместо смрт, се случило чудо кое и денес се раскажува. Четирите суви колци за кои бил врзан наеднаш позеленеле и пораснале во високи, разгранети дрвја. Луѓето со векови верувале дека лисјата и кората од овие дрвја имаат чудотворна моќ, па многубројни болни кои доаѓале на тоа место добивале целосно исцеление. Во 259 година, за време на владеењето на царот Валеријан, свети Терапонт бил свирепо заклан, преселувајќи се со душата во вечното Царство Божјо.
